სემინარი სტატისტიკურ მონაცემთა შეჯერების შესახებ სხვადასხვა წყაროებისა და მეთოდების გამოყენებით

თარიღი: 22 ოქტომბერი 2018

დღეს, 22 ოქტომბერს, თბილისში, სასტუმრო ,,ქორთიარდ მარიოტში“ დაიწყო სასწავლო სემინარი სახელწოდებით „სტატისტიკურ მონაცემთა შეჯერება სხვადასხვა წყაროების და მეთოდების გამოყენებით“. სემინარი ტარდება ევროპის თავისუფალი ვაჭრობის ასოციაციის (EFTA), ნორვეგიის სტატისტიკის სამსახურისა და საქსტატის ორგანიზებით. 

სემინარის მიზანს წარმოადგენს სტატისტიკურ მონაცემთა წარმოების მეთოდოლოგიური და პრაქტიკული ასპექტების განხილვა, რომლებიც მონაცემთა სხვადასხვა წყაროების გამოყენებას ითვალისწინებს. შერჩევითი კვლევების და ადმინისტრაციული მონაცემების შეჯერება წამყვანი სტატისტიკური სამსახურების მიერ აქტიურად გამოიყენება, მონაცემთა ხარისხის სრულყოფის და რესპონდენტებზე ტვირთის შემსუბუქების მიზნით. 
სემინარში საქსტატის წარმომადგენლებთან ერთად ევროპის, სამხრეთ კავკასიისა და ცენტრალური აზიის რეგიონის სხვადასხვა ქვეყნის სტატისტიკური სამსახურების წარმომადგნელები მონაწილეობენ. სასწავლო სემინარი გაგრძელდება 26 ოქტომბრამდე.