პოლიტიკის დოკუმენტის პრეზენტაცია

თარიღი: 28 თებერვალი 2020

დღეს საქართველოს მთავრობის ინიციატივით ღონისძიება - პოლიტიკის დაგეგმვისა და კოორდინაციის განახლებული სისტემის პრეზენტაცია გაიმართა. შეხვედრა, რომელიც სასტუმრო ,,შერატონ მეტეხი პალასში“ შედგა, მთავრობის ადმინისტრაციის, საჯარო უწყებებისა და საერთაშორისო ორგანიზაციების წარმომადგენლები, ასევე საქართველოში აკრედიტირებული დიპლომატები ესწრებოდნენ. ღონისძიების მონაწილეებს მისასალმებელი სიტყვით მთავრობის ადმინისტრაციის ხელმძღვანელმა ნათია მეზვრიშვილმა, ევროკავშირის წარმომადგენლობის სპიკერმა, გაეროს განვითარების პროგრამის მუდმივმა წარმომადგენელმა საქართველოში ლუიზა ვიტონმა და საქართველოში გაერთიანებული სამეფოს საგანგებო და სრულუფლებიანმა ელჩმა ჯასტინ მაკენზი სმიტმა მიმართა. გამომსვლელებმა ზემოაღნიშნული სისტემის მნიშვნელობასა და საჭიროებებზე ისაუბრეს.

ღონისძიების ფარგლებში საქართველოს სტატისტიკის ეროვნული სამსახურის აღმასრულებელი დირექტორის მოადგილემ პაატა შავიშვილმა წარმოადგინა ინფორმაცია 2020 – 2023 წლების საქართველოს ოფიციალური სტატისტიკის ეროვნული სისტემის განვითარების სტრატეგიის შესახებ და პოლიტიკის დაგეგმვის, მონიტორინგისა და შეფასების სახელმძღვანელოს როლისა და მნიშვნელობის შესახებ ზემოაღნიშნული დოკუმენტის შემუშავების პროცესში. აღნიშნულ ღონისძიების ორგანიზატორებმა 2020 – 2023 წლების საქართველოს ოფიციალური სტატისტიკის ეროვნული სისტემის განვითარების სტრატეგია ერთ-ერთ სანიმუშო დოკუმენტად აღიარეს.

შეხვედრის ბოლოს გაიმართა პანელური დისკუსიები, სადაც დარგის საერთაშორისო და ადგილობრივმა ექსპერტებმა, დონორებმა და სამოქალაქო საზოგადოების წარმომადგენლებმა განიხილეს ცვლილებები, მიღწეული პროგრესი და შესაძლო გამოწვევები პრაქტიკაში.