საქსტატის ინტერაქტიული პორტალის პრეზენტაცია რუსთავში - „სტატისტიკა ბავშვებისა და მოზარდებისთვის“

თარიღი: 6 დეკემბერი 2022

საქართველოს სტატისტიკის ეროვნულმა სამსახურმა, ქალაქ რუსთავის საჯარო სკოლის მოსწავლეებისთვის  ინტერაქტიული პორტალის - ,,სტატისტიკა ბავშვებისა და მოზარდებისთვის“ პრეზენტაცია გამართა.

 

რუსთავის სკოლის მოსწავლეებისათვის განკუთვნილი ღონისძიება, ქალაქის მერმა ნინო ლაცაბიძემ, ქვემო ქართლში სახელმწიფო რწმუნებულის მოადგილემ  კახა კობერიძემ, საქსტატის აღმასრულებელმა დირექტორმა გოგიტა თოდრაძემ, ასევე საქართველოში გაეროს ბავშვთა ფონდის  წარმომადგენელმა ღასან ხალილმა გახსნეს და დამსწრე საზოგადოებას სიტყვით მიმართეს. პრეზენტაციას ესწრებოდნენ ქ. რუსთავის რამდენიმე სკოლის მოსწავლეები და პედაგოგები, ასევე ადგილობრივი მმართველობისა და  თვითმმართველობის წარმომადგენლები.

 

ბავშვებისა და მოზარდებისათვის განკუთვნილი ინტერაქტიული პორტალი საქსტატმა გაეროს ბავშვთა ფონდის (UNICEF) ფინანსური და ტექნიკური მხარდაჭერით მოამზადა, რომლის მიზანია სტატისტიკურ მონაცემთა წარმოება და გავრცელება ბავშვებისათვის ადვილად აღსაქმელი ფორმებით, ასევე სტატისტიკურ მონაცემებზე მათი ხელმისაწვდომობის უზრუნველყოფა.

 

საქსტატის აღმასრულებელი დირექტორის გოგიტა თოდრაძის თქმით, პორტალი ბავშვებს და მოზარდებს საშუალებას აძლევს, თანამედროვე ვიზუალური საშუალებებით მიიღონ სასარგებლო ინფორმაცია ქვეყნის სოციალურ-ეკონომიკური და დემოგრაფიული მდგომარეობის შესახებ. მისი თქმით, პორტალი მნიშვნელოვნად შეუწყობს ხელს ბავშვებს და მოზარდებს გაიღრმავონ ცოდნა სტატისტიკის სფეროში, გაიუმჯობესონ ინფორმაციის სწორად აღქმისა და ანალიტიკური აზროვნების უნარები, იყვნენ უფრო მეტად ინფორმირებულები ბავშვთა უფლებების შესახებ და მიიღონ მტკიცებულებებზე დაფუძნებული გადაწყვეტილებები.

 

„დღეს საქსტატმა რუსთავში გაეროს ბავშვთა ფონდის წარმომადგენლობასთან ერთად ძალიან საინტერესო შეხვედრა გამართა. ჩვენ ვნახეთ ახალი პორტალი, რომელიც უშუალოდ ბავშვებისთვის არის განკუთვნილი. პორტალზე არსებული ინფორმაცია ბავშვებს საშუალებას მისცემს ობიექტურ და სწორ ინფორმაციაზე დაყრდნობით გააკეთონ ანალიზი.“ - აღნიშნა ქალაქ რუსთავის მერმა ნინო ლაცაბიძემ.

 

„მოხარული ვარ, რომ დღეს  სტატისტიკის ეროვნულ სამსახურთან ერთად, ქალაქ რუსთავში  წარვადგინეთ პორტალი ბავშვებისა და მოზარდებისთვის. ეს პორტალი ძალიან მნიშვნელოვანია, რადგან ის გვაძლევს ინფორმაციას საქართველოში ბავშვთა უფლებების შესახებ.  პორტალის საშუალებით ბავშვებსა და ახალგაზრდებს შესაძლებლობა ეძლევათ მიიღონ ინფორმაცია მათი უფლებების შესახებ. პორტალი ბავშვებისთვის ქმნის მნიშვნელოვან პლატფორმას, რისი საშუალებითაც მათ შეუძლიათ გაანალიზონ და დაიცვან საკუთარი უფლებები.“ - განაცხადა გაეროს ბავშვთა ფონდის  წარმომადგენელმა საქართველოში  ღასან ხალილმა.

 

ბავშვებებისა და მოზარდებისთვის განკუთვნილი პორტალი ორი ძირითადი ნაწილისგან  შედგება:

 

პირველი ნაწილი - „სტატისტიკა ბავშვებისთვის“ - განკუთვნილია 8-დან 12 წლის ასაკის ბავშვებისთვის. ამ ნაწილში წარმოდგენილი თემები მორგებულია შესაბამის სამიზნე აუდიტორიაზე, მოიცავს სახალისო შეკითხვებს სხვადასხვა კატეგორიებიდან, როგორიცაა: დემოგრაფია, განათლება, სოფლის მეურნებობა და ა.შ. პორტალი ასევე აერთიანებს,  საინტერესო ფაქტებს საქართველოს რეგიონების შესახებ. 

 

ინფორმაციის უკეთ აღქმისთვის გამოყენებულია ვიზუალიზაციის მრავალფეროვანი საშუალებები, როგორიცაა - ინფოგრაფიკები, ანიმაციები, ვიდეო გრაფიკა და ინტერაქტიული დიაგრამები. 

 

ამავე ნაწილში, მომხმარებელს საშუალება ეძლევა გაეცნოს საინტერესო სტატისტიკურ ფაქტებს, შეავსოს თემატური ქვიზები და მიიღოს  სერტიფიკატი. 

მეორე ნაწილი - „სტატისტიკა მოზარდებისთვის“ განკუთვნილია 13-დან 19 წლის ასაკის ახალგაზრდებისთვის, სადაც წარმოდგენილია საინტერესო ინფორმაცია ჩვენი ქვეყნის და მოსახლეობის შესახებ. აღნიშნული ნაწილის მეშვეობით მომხმარებელს ეძლევა შესაძლებლობა ამოხსნას შემეცნებითი ქვიზი და გაეცნოს სახალისო სტატისტიკურ ფაქტებს. 

ღონისძიების ფარგლებში რუსთავის სკოლის მოსწავლეებმა, პორტალის გამოყენებით, შემეცნებითი ქვიზები და დავალებები შეასრულეს. შეხვედრის ბოლოს კი მათ სპეციალური სიგელები და  სიმბოლური საჩუქრები გადაეცათ.