გოგიტა თოდრაძე აზიისა და წყნარი ოკეანის რეგიონის მაღალი დონის კონფერენციაში მონაწილეობს

თარიღი: 16 ივლისი 2025

საქსტატის აღმასრულებელი დირექტორი გოგიტა თოდრაძე აზიისა და წყნარი ოკეანის რეგიონის მაღალი დონის სამუშაო შეხვედრაში მონაწილეობს, რომელიც 14-16 ივლისის პერიოდში ინდოეთში, ქ. ნიუ-დელიში იმართება.

 

ღონისძიება გაეროს სტატისტიკის სამმართველოს (UNSD) და აზიისა და წყნარი ოკეანის სტატისტიკის ინსტიტუტის (UN SIAP) ორგანიზებით იმართება, რომელშიც შესაბამისი რეგიონის 16 ქვეყნის სტატისტიკის სამსახურის ხელმძღვანელი პირები მონაწილეობენ.

 

კონფერენცია ეძღვნება თემას: "მონაცემთა ეთიკა, მართვა და ხარისხი ცვალებად მონაცემთა ეკოსისტემაში", რომელიც ოთხ თემატურ სესიად არის ორგანიზებული: სტატისტიკის ეროვნული სამსახურების ევოლუციური როლი, ინსტიტუციური და ორგანიზაციული ჩარჩოების მოდერნიზაცია, ოფიციალური სტატისტიკის ხარისხის უზრუნველყოფა და ოფიციალური სტატისტიკის წარმოების თანამედროვე მეთოდების დანერგვა. სესიები ინტერაქტიული ჯგუფური დისკუსიებითა და გამოცდილების გაცვლით მიმდინარეობს.

 

მოხსენების და პანელურ დისკუსიებში მონაწილეობის გარდა, გოგიტა თოდრაძე ერთ-ერთ სესიასაც უხელმძღვანელებს, რომლის მიზანია სტატისტიკის ეროვნული სამსახურების შესაძლებლობების გაძლიერება, რათა მათ შეძლონ გაუმკლავდნენ სწრაფად ცვალებად მონაცემთა ლანდშაფტს და ოფიციალურ სტატისტიკაზე მზარდ მოთხოვნებს.

 

საქართველოსთვის ამ ღონისძიებაში მონაწილეობა წარმოადგენს მნიშვნელოვან შესაძლებლობას საერთაშორისო გამოცდილების მიღებისა და უახლესი სტანდარტების შესწავლისთვის. მსგავსი ტიპის შეხვედრებში მონაწილეობა ხელს უწყობს ქვეყნის სტატისტიკის სისტემის მოდერნიზაციას, მონაცემთა ეთიკისა და ხარისხის სტანდარტების დანერგვას, ასევე რეგიონული თანამშრომლობის გაღრმავებას.

 

ღონისძიების დასრულების შემდეგ მიღებული რეკომენდაციები და საუკეთესო პრაქტიკა დაეხმარება სტატისტიკის სამსახურებს შემდგომი სტრატეგიული მიმართულებების დასახვაში და სტატისტიკური მომსახურების ხარისხის გაუმჯობესებაში.