საქსტატი უზბეკეთის სტატისტიკის სამსახურის დელეგაციას მასპინძლობს

თარიღი: 8 სექტემბერი 2025

8-12 სექტემბერს საქართველოს სტატისტიკის ეროვნული სამსახური უზბეკეთის რესპუბლიკის სტატისტიკის ეროვნული კომიტეტის დელეგაციას მასპინძლობს. ერთი კვირის განმავლობაში საქსტატის თანამშრომლები უზბეკ კოლეგებს თავიანთ გამოცდილებასა და სამუშაო პრაქტიკას გაუზიარებენ.  ვიზიტი ორი ქვეყნის სტატისტიკის სამსახურებს შორის სტატისტიკური თანამშრომლობის გაძლიერებისა და ცოდნის გაზიარების მნიშვნელოვანი ინიციატივაა.

 

შეხვედრები ორ პარალელურ ჯგუფად წარიმართება. ძირითადი ჯგუფი ყურადღებას გაამახვილებს სტრატეგიულ საკითხებზე, მათ შორის სტატისტიკური სამუშაოების დაგეგმვისა და კოორდინაციის, მონაცემთა ხარისხის და ალტერნატიული მონაცემთა წყაროების გამოყენებაზე. პარალელურად, მეორე ჯგუფი განიხილავს ისეთ დარგობრივ სტატისტიკურ სფეროებს, როგორიცაა მრეწველობა, ვაჭრობა, სოფლის მეურნეობა, მომსახურება, ინვესტიციები, დემოგრაფია და შრომის სტატისტიკა.

 

საქსტატის სხვადასხვა დარგობრივი დეპარტამენტის თანამშრომლები უზბეკური დელეგაციის წევრებს გაუზიარებენ საქართველოს გამოცდილებას. შეხვედრებზე განხილული იქნება თანამედროვე გამოკვლევის მეთოდები, მონაცემთა შეგროვების, დამუშავების, ანალიზისა და გავრცელების არსებული პრაქტიკა. ვიზიტი ხაზს უსვამს საქსტატის მზადყოფნას, წვლილი შეიტანოს რეგიონში სტატისტიკური პრაქტიკის განვითარებასა და საერთაშორისო თანამშრომლობის ხელშეწყობაში.