ამერიკის შეერთებული შტატების სოფლის მეურნეობის დეპარტამენტმა (USDA) საქართველოს სტატისტიკის ეროვნულ სამსახურს 160 ათასი ლარის ღირებულების ტექნიკური დახმარება გაუწია. ტექნიკური დახმარების ფარგლებში USDA-მ საქსტატს 365 ანდროიდ სისტემის ტაბლეტი და ორი სერვერი გადასცა. 
ტექნიკური დახმარების გადაცემის ოფიციალურ ცერემონიალს ამერიკის შეერთებული შტატების ელჩი საქართველოში იან კელი და საქართველოს სოფლის მეურნეობის მინისტრი ლევან დავითაშივილი დაესწრენენ. „პირველ რიგში მინდა ავღნიშნო, რომ ძალიან მოხარული ვარ, რომ ვიღებ მონაწილეობას ამ ტექნიკის გადაცემის ცერემონიალში. ჩვენ გადავეცით ტაბლეტები და სხვა სახის კომპიუტერული აღჭურვილობა, ეს მნიშვნელოვანია, რადგან ხელს შეუწყობს ჩვენს საერთო მიზნებსა და ამოცანებს, რაც გულისხმობს პროდუქტიულობის გაუმჯობესებას სოფლის მეურნეობის სექტორში. ასევე დაეხმარება საქართველოს, რომ წავიდეს კიდევ უფრო წინ 21-ე საუკუნის ეკონომიკაში. რა თქმა უნდა, ინფორმაციის დამუშავებისა და მოგროვება პროცესი იქნება სრული და გამარტივებული. ეს ჩვენს საერთო მიზნებს შეუწყობს ხელს, გახდის საქართველოს კიდევ უფრო კონკურენტუნარიან საერთაშორისო არენაზე“- განაცხადა ელჩმა კელმა. 
ანდროიდ სისტემის ტაბლეტების გამოყენებით, საქსტატს საშუალება მიეცემა დანერგოს თანამედროვე მონაცემთა შეგროვების ელექტრონული მეთოდი (CAPI). პირველ ეტაპზე იგეგმება CAPI მეთოდის გამოყენება სასოფლო მეურნეობათა გამოკვლევების მონაცემთა შესაგროვებლად. CAPI მეთოდით მონაცემთა შეგროვება საქსტატში პირველად 2018 წლის იანვრიდან დაიწყება და ის ქაღალდის კითხვარს ჩაანაცვლებს. მონაცემთა შეგროვების ელექტრონული მეთოდის დანერგვა გააუმჯობესებს მონაცემთა ხარისხს, დროულობას, შემცირდება მონაცემთა ბაზაში შეყვანის, საველე პერსონალის კოორდინაციისა და კითხვარის ბეჭდვის ხარჯები. 
საქსტატის აღმასრულებელმა დირექტორმა მერი დაუშვილმა გამოხატა მადლიერება ამერიკის მთავრობის წარმომადგენლების მიმართ, საქსტატის განვითარებაში შეტანილი წვლილისა და მრავალწლიანი მხარდაჭერისათვის. მან ასევე აღნიშნა, რომ ანდროიდ სისტემის ტაბლეტის მეშვეობით მონაცემთა შეგროვებაზე გადასვლა საქსტატისთვის განსაკუთრებული მნიშვნელობის ახალი პროექტია, რომელიც ხელს შეუწყობს გამოკვლევის მოდერნიზაციას და ეფექტიანობის ზრდას. 
„ამერიკის შეერთებულმა შტატების სოფლის მეურნეობის დეპარტამენტმა უმნიშვნელოვანესი დახმარება გაუწია საქართველოს მთავრობას. ჩვენ უკვე შეგვიძლია ახალი ტექნოლოგიების გამოყენებით ვაწარმოოთ სტატისტიკა, რაც გააუმჯებესებს ინფორამციის მიღების ოპერატიულობას, უფრო საიმედოს გახდის სასოფლო-სამურნეო სტატისტიკას, რაც საბოლოოდ ეფექტიანი სასოფლო-სამეურნეო პოლიტიკისა და პოლიტიკური გადაწყვეტილების მიღებაში დაეხმარება, როგორც საქართველოს სოფლის მეურნეობის სამინისტროს, ისე საქართველოს მთავრობას. აღსანიშნავია, რომ ელექტრონულ ინფორმაციაზე დაფუძნებული გამართული სტატისტიკის წარმოება ევროკავშირთან ასოცირების ფარგლებში ნაკისრი ჩვენი ერთ-ერთი ვალდებულებაცაა“, - განაცხადა სოფლის მეურნეობის მინისტრმა ლევან დავითაშვილმა. 
აშშ-ს სოფლის მეურნეობის დეპარტამენტი (USDA) საქსტატთან სოფლის მეურნეობის სტატისტიკის განვითარების მიმართულებით 2005 წლიდან აქტიურად თანამშრომლობს. წლების განმავლობაში USDA საქსტატის მნიშვნელოვანი პარტნიორია და ტექნიკურ და მეთოდოლოგიურ მხარდაჭერას უწევს საქსტატს სოფლის მეურნეობის სტატისტიკის განსავითარებლად.