შვედი ექსპერტები საქსტატში სასწავლო კურსს ატარებენ

თარიღი: 23 მაისი 2018

საქართველოს სტატისტიკის ეროვნული სამსახური აგრძელებს მუშაობას სტატისტიკური სისტემის გაძლიერების მიმართულებით. ამასთან დაკავშირებით, საქსტატისა და შვედეთის სტატისტიკის ცენტრალური ბიუროს ერთობლივი პროექტის ფარგლებში, შვედი ექსპერტები საქსტატისა და სხვადასხვა უწყების თანამშრომლებს "პრაქტიკული სტატისტიკის მოკლე კურსს" უტარებენ. სწავლება 21 მაისს დაიწყო და ორი კვირის განმავლობაში გაგრძელდება.

კურსი მოიცავს, როგორც პრაქტიკულ, ისე თეორიულ მასალას სტატისტიკური შერჩევითი გამოკვლევების შესახებ. საქსტატში გამართული სწავლების მთავარი მიზანია მონაწილეებს გააცნოს სტატისტიკური გამოკვლევის ჩატარების ყველა ეტაპი (კვლევის დაგეგმვა, საველე სამუშაოები, კვლევის ანგარიშის წარდგენა). გარდა ამისა, სემინარის პრაქტიკულ ნაწილში მონაწილეები თავად ჩაატარებენ კვლევას და წარმოადგენენ მიღებულ შედეგებს.
აღსანიშნავია, რომ შვედეთის სტატისტიკის ცენტრალურ ბიუროსთან თანამშრომლობის ფარგლებში აღნიშნული კურსი მესამედ ტარდება. სწავლების პირველი ორი ეტაპი 2015 -2017 წლებში განხორციელდა. მიმდინარე სასწავლო კურსში საქსტატის თანამშრომელის გარდა, ქვეყნის სხვადასხვა საჯარო უწყებების წარმომადგენლები მონაწილეობენ. სწავლება ხელს შეუწყობს პარტნიორ ადმინისტრაციულ ორგანოებში სტატისტიკის წარმოების სტანდარტების, მეთოდოლოგიის და ინფორმირებულობის ზრდას.