თბილისში საქსტატის 100 წლის და გენდერული სტატისტიკის წარმოების 20 წლის იუბილე აღინიშნება

თარიღი: 26 ივლისი 2019

   საქართველოს სტატისტიკის ეროვნული სამსახურის (საქსტატი) 100 წლის იუბილესა და გენდერული სტატისტიკის წარმოების 20-წლიან თარიღთან დაკავშირებით, თბილისში რეგიონული კონფერენცია - "გენდერული სტატისტიკა: გამოწვევები და შესაძლებლობები მდგრადი განვითარების მიზნების (SDGs) მონიტორინგისთვის" იმართება. კონფერენცია, რომელიც საქსტატისა და გაეროს ქალთა ორგანიზაციის ინიციატივით ტარდება, ორი დღის განმავლობაში გაგრძელდება. ღონისძიება გაეროს ქალთა ორგანიზაციის გენდერული სტატისტიკის გლობალური ინიციატივისა და ავსტრიისა და შვეიცარიის მთავრობების მხარდაჭერით იმართება.

 

   კონფერენციის მონაწილეებს მისასალმებელი სიტვით  საქსტატის აღმასრულებელმა დირექტორმა გოგიტა თოდრაძემ, საქართველოს პარლამენტის ვიცე-სპიკერმა თამარ ჩუგოშვილმა და გაეროს ქალთა ორგანიზაციის (UN Women) მთავარმა სტატისტიკოსმა პაპა სეკმა მიმართეს.  გოგიტა თოდრაძის თქმით, „სტატისტიკის ეროვნული სამსახურის საიუბილეო თარიღის აღსანიშნავად, დაგეგმილია მთელი რიგი ღონისძიებები, მათ შორისაა რეგიონული კონფერენცია, რომელშიც მონაწილეობას იღებს მსოფლიოს ათამდე ქვეყნის სტატისტიკის სამსახურის ხელმძღვანელი. მინდა, მივულოცო აღნიშნული დღე ყველა სტატისტიკოსს და მადლობა გადავუხადო ნაყოფიერი თანამშრომლობისთვის. ამავდროულად, მსურს, მადლობა გადავუხადო  გაეროს ქალთა ორგანიზაციას (UN Women), რომელმაც საშუალება მოგვცა, სტატისტიკის 100 წლის იუბილე ასეთი ფართო მასშტაბით აღგვენიშნა“.   

 

 


   რეგიონულ კონფერენციაში მონაწილეობას აღმოსავლეთ პარტნიორობის (EaP),  ცენტრალური აზიის  ქვეყნების, იტალიის, საფრანგეთისა და  უნგრეთის სტატისტიკის სამსახურების ხელმძღვანელი პირები და საერთაშორისო ორგანიზაციების მაღალი დონის წარმომადგენლები იღებენ. ღონისძიებას საქართველოს სამთავრობო უწყებების, არასამთავრობო ორგანიზაციების (NGOs), სამეცნიერო წრეებისა და საქართველოში აკრედიტებული საერთაშორისო ორგანიზაციების წარმომადგენლები ესწრებიან.  

 

 

   კონფერენციის მონაწილეები მდგრადი განვითარების მიზნების (SDGs) ნაციონალიზაციის პროცესში მიღწეული წარმატებების, გენდერული სტატისტიკის წარმოებისა და გავრცელების, გენდერულ ჭრილში აქტივების ფლობისა და დროის გამოყენების, ასევე, ქალთა მიმართ ძალადობის კვლევების შედეგად გამოვლენილ გამოწვევებსა და სხვა პრიორიტეტულ საკითხებზე იმსჯელებენ. 

 

 

   კონფერენციის პირველი დღის დასასრულს, სტატისტიკის სამსახურის საიუბილეო, 100 წლის თარიღის აღსანიშნავად, საქართველოს, სომხეთის, უკრაინის, მოლდოვას, ყირგიზეთის, უზბეკეთისა და ტაჯიკეთის სტატისტიკის ეროვნული სამსახურების ხელმძღვანელი პირები ერთობლივ შეთანხმებას მოაწერენ ხელს. დოკუმენტის თანახმად, მხარეები ქვეყნების სტატისტიკის სამსახურებს შორის მეგობრული და კონსტრუქციული თანამშრომლობის გაღრმავებისა და  სტატისტიკის სისტემის შემდგომი განვითარებისათვის სრულ მზადყოფნას გამოთქვამენ. 

 

 

   კონფერენციის ფარგლებში ტარდება გენდერული მონაცემების ვიზუალიზაციის ჰაკათონიც, რომელიც გენდერული სტატისტიკის მონაცემებს ეძღვნება და ახალგაზრდებში სტატისტიკური მონაცემების შესახებ ცნობიერების ამაღლების, მონაცემთა ანალიზის, გამოყენებისა და ინოვაციური პროდუქტების განვითარების ხელშეწყობისკენაა მიმართული. ჰაკათონის მონაწილეები იმ გენდერულ მონაცემებზე იმუშავებენ, რომლებსაც საქსტატი ბოლო 20 წელია აგროვებს.