საქართველოს სტატისტიკის ეროვნულმა სამსახურმა 100 წლის იუბილე აღნიშნა

თარიღი: 26 ივლისი 2019

სტატისტიკის ეროვნული სამსახური დაარსებიდან 100 წლის იუბილეს აღნიშნავს.  საიუბილეო თარიღთან დაკავშირებით გუშინ,  25 ივლისს,  საზეიმო ღონისძიება გაიმართა. 

ღონისძიებაზე დამსწრე საზოგადოებას, მისასალმებელი სიტყვით საქართველოს პრემიერ მინისტრმა მამუკა ბახტაძემ, საქართველოს პარლამენტის თავმჯდომარემ არჩილ თალაკვაძემ და საქსტატის აღმასრულებელმა დირექტორმა გოგიტა თოდრაძემ მიმართეს.  სასტუმრო ,,თბილისი რუმსში“ გამართულ  ღონისძიებას 300-ზე მეტი სტუმარი ესწრებოდა, მათ შორის იყვნენ საქართველოს მთავრობისა და პარლამენტის წევრები, საერთაშორისო ორგანიზაციებისა და მედიის წარმომადგენლები, საქსტატის თანამშრომლები. 

საქართველოს პრემიერ მინისტრმა საქსტატის თანამშრომლებს იუბილე მიულოცა. მთავრობის მეთაურის თქმით, ნებისმიერი დემოკრატიული საზოგადოებისთვის  ობიექტურ სტატისტიკურ ინფორმაციაზე წვდომა სასიცოცხლოდ მნიშვნელოვანია.  „ეს არის სამსახური, რომელმაც გაუძლო ისტორიულ ქარტეხილს, რომელიც დაკომპლექტებულია მაღალი დონის პროფესიონალებით და სადაც მუშაობენ პატრიოტი და ქვეყნის ერთგული მოქალაქეები. მივესალმები იმ პროგრესს, რომელიც გვაქვს სტატისტიკის სამსახურში ბოლო წლების განმავლობაში. ვიცი ჩვენი ევროპელი და საერთაშორისო პარტნიორების დამოკიდებულება იმ რეფორმების მიმართ, რომელიც ამ სამსახურში გატარდა. მადლობას ვუხდი ყველას, ვინც ჩართული იყო ამ პროცესში.  21-ე საუკუნე ინფორმაციული ეპოქის პერიოდია. აქედან გამომდინარე, თქვენს სამსახურს კიდევ უფრო მნიშვნელოვანი დატვირთვა აქვს. თქვენ ხართ ინფორმაციის წყარო ყველა სხვა უწყებისთვის, რომელიც ვალდებულია, თქვენს ინფორმაციაზე დაყრდნობით შეიმუშაოს პოლიტიკა, რომ განვავითაროთ ჩვენი ქვეყანა და დავძლიოთ ქვეყნის წინაშე არსებული გამოწვევები. მსურს განსაკუთრებული მადლობა გადავუხადო ჩვენ საერთაშორისო პარტნიორებს. რომ არა მათი მხარდაჭერა, საქართველოს სტატისტიკის სამსახური ვერ შეძლებდა იმ წარმატების მიღწევას, რომელიც გვაქვს ბოლო წლების განმავლობაში. ამის აღიარებაა ის, რომ საქართველოს სტატისტიკის სამსახური გაეროს სტატისტიკის კომიტეტის წევრი გახდა", - განაცხადა მამუკა ბახტაძემ.

 საქართველოს პარლამენტის თავმჯდომარემ არჩილ თალაკვაძემ სამსახურის თანამშრომლებს საიუბილეო თარიღი მიულოცა და მათი საქმიანობის მაღალ მნიშვნელობაზე გაამახვილა ყურადღება.  „სტატისტიკის ეროვნული სამსახური 100 წლისაა! საქართველოს პარლამენტის სახელით მადლობას ვუხდი სამსახურის თითოეულ თანამშრომელს და მის ხელმძღვანელს გაწეული სამუშაოსთვის. სანდო სტატისტიკური მონაცემებით სახელმწიფო ესაუბრება არა მხოლოდ თავის მოქალაქეებს, არამედ ცივილიზებულ მსოფლიოს, რომელიც ყოველდღიურად იღებს გადაწყვეტილებებს ვისთან ითანამშრომლოს, სად ჩადოს ინვესტიცია, რომელ ქვეყანასთან ჰქონდეს სავაჭრო ურთიერთობები და ტურიზმი. სტატისტიკური მონაცემების შექმნა დიდი პასუხისმგებლობაა“, - განაცხადა პარლამენტის თავმჯდომარემ.

 

დამსწრე საზოგადოებას მისასალმებელი სიტყვით მიმართა საქსტატის აღმასრულებელმა დირექტორმა, გოგიტა თოდრაძემ. მისი თქმით, 100 წლის იუბილე  უმნიშვნელოვანესი თარიღია სამსახურის არსებობის ისტორიაში. უწყების ხელმძღვანელმა ასევე, იმ გამოწვევებსა და რეფორმებზე ისაუბრა, რომელიც დღესდღეობით საქსტატში მიმდინარეობს. გოგიტა თოდრაძემ მადლობა გადაუხადა სამსახურის თითოეულ თანამაშრომელს ნაყოფიერი საქმიანობისთვის.

100 წლის იუბილესთან დაკავშირებულ ღონისძიებაში მონაწილეობის მისაღებად, საქართველოში ჩამოვიდნენ აღმოსავლეთ პარტნიორობისა (EaP) და ცენტრალური აზიის  ქვეყნების სტატისტიკის სამსახურის ხელმძღვანელი პირები, ასევე იტალიის, საფრანგეთის და უნგრეთის სტატისტიკის სამსახურებისა და საერთაშორისო ორგანიზაციების წარმომადგენლები.
საზეიმო ღონისძიებას დაესწრნენ და საქსტატის თანამშრომლებს 100 წლის იუბილე მიულოცეს უკრაინის სტატისტიკის სახელმწიფო სამსახურის თავმჯდომარემ იგორ ვერნერმა, მოლდოვას რესპუბლიკის სტატისტიკის ეროვნული ბიუროს გენერალურმა დირექტორმა ვიტალი ვალკოვმა და სომხეთის რესპუბლიკის სტატისტიკის კომიტეტის პრეზიდენტმა  სტეპან მნაცაკანიანმა.

ღონისძიებაზე მოწვეულმა სტუმრებმა სპეციალურად ამ დღისთვის საქსტატის მიერ მომზადებული რამდენიმე ვიდეო რგოლი იხილეს. მათ შორის, სტატისტიკის ერთსაუკუნოვანი ისტორიის ამსახველი დოკუმენტური ფილმი, სადაც ისტორიულ ფაქტებზე დაყრდნობით წარმოდგენილი იყო სამსახურის დაარსებისა და ამ ერთი საუკუნის მანძილზე, მისი განვითარების ისტორია.

100 წლის იუბილესადმი მიძღვნილ საზეიმო ღონისძიებაზე გოგიტა თოდრაძემ საპატიო სიგელი გადასცა საქსტატის ღვაწლმოსილ თანამშრომლებს, რომლებიც სტატისტიკის სისტემაში უკვე 50 წელზე მეტია მუშაობენ. 

აღმასრულებელმა დირექტორმა სტატისტიკის ეროვნული სამსახურის ყველა ყოფილი ხელმძღვანელი საქსტატის საიუბილეო მონეტით დააჯილდოვა და მადლობა გადაუხადა სტატისტიკის სისტემის განვითარებაში შეტანილი წვლილისთვის.

საიუბილეო თარიღის აღსანიშნავად დაგეგმილი ღონისძიებები,  გაეროს ქალთა ორგანიზაციის (UN Women) ფინანსური მხარდაჭერით განხორციელდა. 

 

წელი