საქსტატის თანამშრომლების სასწავლო ვიზიტი ბულგარეთში

თარიღი: 2 ოქტომბერი 2019

საქართველოს სტატისტიკის ეროვნული სამსახურის თანამშრომლები ბულგარეთში გამართულ ახალგაზრდა სტატისტიკოსების სასწავლო კურსს დაესწრნენ. სოფიაში ჩატარებულ შეხვედრაზე კურსის მონაწილეები სტატისტიკური კვლევის თეორიას  გაეცნენ. სასწავლო კურსის ფარგლებში, ბულგარეთის სტატისტიკის ეროვნული ინსტიტუტის წამყვანმა ექსპერტებმა კურსის მონაწილეებს სტატისტიკური კვლევების საკითხებზე თავიანთი პრაქტიკული გამოცდილება  გაუზიარეს.სწავლების მონაწილეები ასევე გაეცნენ ბიზნეს სტატისტიკის, შემოსავლებისა და ცხოვრების დონის სტატისტიკის, სამუშაო ძალის, მაკროეკონომიკის სტატისტიკისა და ალტერნატიული მონაცემთა წყაროების (დიდი მონაცემების) სფეროში ბულგარეთის სტატისტიკის ინსტიტუტში და მსოფლიოში არსებულ გამოცდილებას. 

აღნიშნული სასწვალო კურსი უკვე მესამე წელია, რაც ბულგარეთის სტატისტიკის ორგანიზებით და ბულგარეთის საგარეო უწყების მხარდაჭერით ხორციელდება. მიმდინარე წელს, აღნიშნულ კურსს მოლდოვის, ბელარუსიის, უკრაინის, საქართველოს, აზერბაიჯანისა და სომხეთის ქვეყნების 24 მონაწილე ესწრებოდა. სასწავლო კურსის დახურვის ცერემონიაზე  ოფიციალური ვიზიტით მიწვეულნი იყვნენ საქართველოს სტატისტიკის ეროვნული სამსახურის აღმასრულებელი დირექტორი გოგიტა თოდრაძე და სომხეთის რესპუბლიკის სტატისტიკური კომიტეტის პრეზიდენტი სტეფან მნაცაკანიანი.   

საქართველოსა და ბულგარეთის სტატისტიკის სამსახურს შორის ურთიერთანამშრომლობის მემორანდუმი 2016 წელს გაფორმდა.