საქსტატსა და დანიის სტატისტიკას შორის ევროკავშირის პროგრამა TWINNING-ის პროექტი დასრულდა

თარიღი: 24 ნოემბერი 2021

24 ნოემბერს საქართველოს სტატისტიკის ეროვნული სამსახურისა და დანიის სტატისტიკას შორის ევროკავშირის პროგრამა Twinning-ის ფარგლებში მიმდინარე პროექტის - „საქართველოს ეროვნული სტატისტიკური სისტემის შესაძლებლობების განვითარება“ ოფიციალური დახურვის ცერემონია გაიმართა. დახურვის ცერემონიაზე, რომელიც სასტუმრო „სტამბაში“ ჩატარდა, საქსტატის აღმასრულებელმა დირექტორმა მისასალმებელი სიტყვით მიმართა დამსწრე საზოგადოებას და პროექტის ფარგლებში განხორციელებული აქტივობებისა და შედეგების შესახებ ისაუბრა.


პროექტის დახურვის ცერემონიაზე, პროექტისა და სტატისტიკური სისტემის შესაძლებლობების განვითარების მნიშვნელობის შესახებ, ასევე ისაუბრეს ევროკავშირის პროექტების განყოფილების უფროსის მოადგილემ კატალინ გერმანმა, დანიის  კონსულმა საქართველოში ბატონმა ესბენ ემბორგმა,  დანიის სტატისტიკის კომუნიკაციებისა და გაყიდვების დირექტორმა კარსტენ ზანგენბერგმა, საქართველოს საგარეო საქმეთა სამინისტროს წარმომადგენელმა დავით ბუჯიაშვილმა და სხვა მაღალი რანგის მოწვეულმა სტუმრებმა.

 

ევროკავშირის მიერ დაფინანსებული Twinning-ის პროექტის მთავარ მიზანს წარმოადგენდა საქართველოსა და ევროკავშირს შორის ასოცირების შესახებ შეთანხმებით გათვალისწინებული გეგმების შესრულების ხელშეწყობა, საქსტატის მიერ დროული, სანდო და საერთაშორისო დონეზე შესადარისი მონაცემების წარმოება და მისი დაახლოება ევროპულ სტანდარტებთან. Twinning-ის პროექტი საქსტატში 2019 წლის აპრილში დაიწყო და ოთხ კომპონენტს მოიცავდა, როგორიცაა, საგარეო ვაჭრობა, ეროვნული ანგარიშები, სოციალური სტატისტიკა და ბიზნეს სტატისტიკა.  პროექტის ფარგლებში წარმატებულად  განხორციელდა  ექსპერტთა 75 მისია და 6 სასწავლო ვიზიტი ჩეხეთისა და დანიის სტატისტიკის სამსახურებში.

 

პროექტის დახურვის ცერემონიაზე საქსტატის აღმასრულებელმა დირექტორმა Twinning-ის პროექტის ფარგლებში განხორციელებულ მნიშვნელოვან მიღწევებზე ისაუბრა. აღსანიშნავია ახალი საერთაშორისო მეთოდოლოგიებისა და სტანდარტების დანერგვა ეროვნული ანგარიშების და სოციალური სტატისტიკის მიმართულებით.

 

პროექტის ფარგლებში, დანიელი ექსპერტების დახმარებით, საქონლით საერთაშორისო ვაჭრობის სტატისტიკაში ჩატარდა სარკისებური შედარება, რაც პარტნიორ ქვეყნებს შორის ვაჭრობის სტატისტიკური მონაცემების ხარისხის შესაფასებლად ერთ-ერთ ყველაზე ხშირად გამოყენებულ მეთოდს წარმოადგენს. სარკისებური შედარება ექვსი პარტნიორი ქვეყნის (ბულგარეთი, საბერძნეთი, იტალია, ნიდერლანდები, გერმანია, რუმინეთი) და მათთან დაკავშირებული უმსხვილესი სასაქონლო ჯგუფების ანალიზის შედეგად განხორციელდა.


ეროვნული ანგარიშების მიმართულებით მთავარ მიღწევად, 2019 წლის ბოლოს ეროვნულ ანგარიშთა სისტემის ახალი მეთოდოლოგიის (SNA 2008) დანერგვა წარმოადგენს, რაც „ეროვნულ ანგარიშთა სისტემის (ეას) ახალ სტანდარტებზე (SNA 2008) გადასვლას, მთლიანი შიდა პროდუქტისა (მშპ) და მთელი რიგი მაკროეკონომიკური მაჩვენებლების გაანგარიშებას გულისხმობს.


კიდევ ერთ პრიორიტეტულ საკითხს სამუშაო ძალის სტატისტიკაში შრომის საერთაშორისო ორგანიზაციის (ILO) ახალი სტანდარტების დანერგვა წარმოადგენდა. საქსტატმა 2020 დეკემბერში ახალი სტანდარტებით გაანგარიშებული დასაქმებისა და უმუშევრობისა მონაცემები გამოაქვეყნა.


მნიშვნელოვანი მეთოდოლოგიური ცვლილებები განხორციელდა ასევე ბიზნეს სტატისტიკის განვითარების თვალსაზრისით, კერძოდ, ბიზნეს რეგისტრის გაუმჯობესება, მოკლევადიანი სტატისტიკის ახალი ინდიკატორების წარმოება, ტურიზმის სტატისტიკა განვითარება და სხვა.


შეგახსენებთ, რომ ევროკავშირის მიერ დაფინანსებული Twinning-ის პროექტი, „საქართველოს ეროვნული სტატისტიკური სისტემის შესაძლებლობების განვითარება“, საქართველოს სტატისტიკის ეროვნულ სამსახურსა და დანიის სტატისტიკას შორის 2 წელი და 8 თვე მიმდინარეობდა.

წელი