საერთაშორისო სავალუტო ფონდის მისია საქსტატში

თარიღი: 14 თებერვალი 2022

24 იანვრიდან 11 თებერვლის ჩათვლით საქსტატი საერთაშორისო სავალუტო ფონდის მისიას მასპინძლობდა. მის მიზანს წარმოადგენდა ე.წ. სკანერული მონაცემების დანერგვა სამომხმარებლო ფასების ინდექსის გაანგარიშებაში. სკანერული მონაცემები წარმოადგენს ე.წ. „დიდი მონაცემების“ (Big Data) ნაწილს და ერთ-ერთ ყველაზე აქტუალურ მიმართულებას ფასების სტატისტიკაში. აღნიშნული მიმართულების განვითარება საქსტატმა 2019 წლიდან დაიწყო, ხოლო განსაკუთრებული აქტუალობა სკანერულმა მონაცემებმა პანდემიის პერიოდში შეიძინა.

 

აღნიშნული მისია რიგით მეორეა ტექნიკური დახმარების პროექტის ფარგლებში. პანდემიასთან დაკავშირებული შეზღუდვების გათვალისწინებით, ის კვლავ ონლაინ-ფორმატში ჩატარდა. მისიის განმავლობაში სავალუტო ფონდის ექსპერტის დახმარებით მიმდინარეობდა მონაცემთა ანალიზი და დამუშავება, პროგრამული უზრუნველყოფის განვითარება და შესაბამისი ცოდნის და გამოცდილების გაზიარება საქსტატის ფასების სტატისტიკის თანამშრომლებისთვის. შეხვედრების ერთ-ერთი მთავარი შედეგი გახდა ფასების საცდელი ინდექსების გაანგარიშება სკანერული მონაცემებისთვის.

 

ამჟამად არსებული გეგმის თანახმად, 2022 წლის განმავლობაში გაგრძელდება სკანერული მონაცემების ანალიზი და მათი შესაძლო ზეგავლენის შეფასება ინფლაციის მაჩვენებელზე. რაც შეეხება „დიდი მონაცემების“ ინფლაციის გაანგარიშებაში ინტეგრირებას, ის 2023 წლისთვის არის დაგეგმილი.

 

ცნობისათვის, სკანერული მონაცემები წარმოადგენს საცალო ვაჭრობის ობიექტებიდან მიღებულ ინფორმაციას დროის კონკრეტულ პერიოდში რეალიზებული პროდუქციის შესახებ, ე.წ. შტრიხ-კოდების მიხედვით. ფასების შეგროვების ტრადიციულ მეთოდებთან შედარებით, ამ სახის მონაცემები გაცილებით უფრო ზუსტი, დროული და ფართო მოცვის მქონეა, მისი გამოყენება კი მნიშვნელოვნად აამაღლებს ინფლაციის მაჩვენებლის სიზუსტეს.