საქსტატი მაღალი დონის შეხვედრას მასპინძლობს

თარიღი: 28 სექტემბერი 2022

საქართველოს სტატისტიკის ეროვნული სამსახური თბილისში გამართულ მაღალი დონის შეხვედრას მასპინძლობს.  

 

შეხვედრა ევროსტატის, ევროპის თავისუფალი ვაჭრობის ასოციაციის (EFTA) და გაეროს ევროპის ეკონომიკური კომისიის   (UNECE) ორგანიზებით  28 სექტემბერს გაიხსნა და   სამი დღის განმავლობაში გაგრძელდება.   

 

ღონისძიებაში მონაწილეობას იღებენ აღმოსავლეთ ევროპის, კავკასიისა და ცენტრალური აზიის ქვეყნების (სომხეთი, უკრაინა, აზერბაიჯანი, უზბეკეთი, მოლდოვეთი, ყირგიზეთი, ყაზახეთი, ტაჯიკეთი, თურქმენეთი) სტატისტიკის სამსახურების პირველი პირები, ევროსტატისა და საერთაშორისო ორგანიზაციების მაღალი რანგის წარმომადგენლები, საქართველოში ევროკავშირის წარმომადგენლობის უფროსის მოადგილე და სხვა. 

 

შეხვედრა მისასალმებელი სიტყვით საქსტატის აღმასრულებელმა დირექტორმა გახსნა. გოგიტა თოდრაძემ თავის გამოსვლაში მადლობა გადაუხადა ევროსტატს ამ მაღალი დონის შეხვედრის საქართველოში ორგანიზებისთვის და ხაზი გაუსვა სტატისტიკის სფეროში თანამშრომლობის განვითარების საქმეში აღნიშნული ფორმატის მნიშვნელობას, როგორც რეგიონულ ასევე საერთაშორისო დონეზე.    

 

შეხვედრის მიზანს წარმოადგენს სტატისტიკის სფეროში მონაცემთა, როგორც ტრადიციული, ისე ალტერნატიული წყაროების განხილვა,  სტატისტიკის სისტემის კოორდინაცია,  პერსონალურ მონაცემთა დაცვა და სხვა. 

 

შეხვედრის დროს მონაწილეები ისაუბრებენ ოფიციალური სტატისტიკის წარმოების პროცესში მონაცემთა ალტერნატიული  წყაროებისა და ინოვაციური ტექნოლოგიების გამოყენების უპირატესობებსა და შესაძლებლობებზე. ერთმანეთს გაუზიარებენ ინფორმაციას სხვადასხვა ქვეყნის სტატისტიკის სამსახურების მიერ დანერგილი სიახლეების შესახებ, განსაზღვრავენ დარგში არსებულ პრიორიტეტებს და  იმსჯელებენ არსებულ გამოწვევებზე. 

 

შეხვედრის მესამე დღეს, თავმჯდომარის რანგში საქსტატის აღმასრულებელი დირექტორი უხელმძღვანელებს.  გოგიტა თოდრაძე დამსწრე საზოგადოებას გააცნობს ბოლო პერიოდში საქართველოს სტატისტიკის სისტემაში განხორციელებულ მნიშვნელოვან მიღწევებს, ისაუბრებს არსებული გამოწვევებისა და მათი დაძლევის გზების შესახებ.