საქსტატმა მშენებლობის ღირებულების ყოველთვიური ინდექსი დანერგა

თარიღი: 4 ოქტომბერი 2022

საქსტატმა მშენებლობის ღირებულების ყოველთვიური ინდექსის (CCI) გაანგარიშება დაიწყო, რომელიც წარმოადგენს საანგარიშო პერიოდში  სხვადასხვა სახის შენობა-ნაგებობების ასაშენებლად საჭირო სამშენებლო მასალებისა და მომსახურებების ფასების დონის საშუალო მაჩვენებელს, საბაზო პერიოდთან შედარებით. აღნიშნული ინდექსი წარმოადგენს მნიშვნელოვან მაკროეკონომიკურ ინდიკატორს, რომელიც აუცილებელია ქვეყნის საინვესტიციო გარემოს შესაფასებლად, ასევე სამშენებლო სექტორში დაგეგმვის და გადაწყვეტილების მისაღებად.

 

მიმდინარე წლის აპრილში, საქართველოს მთავრობის 2022 წლის 27 აპრილის #753 განკარგულების თანახმად, რომელიც ეხება ინფრასტრუქტურული პროექტების განხორციელების ხელშეწყობის მიზნით ფასთა ინდექსაციის გამოყენების საფუძვლებს, პრინციპებსა და წესს, საქსტატს დაევალა შესაბამისი ინდექსის შემუშავება, რომლის შესაბამისადაც განხორციელდება აღნიშნული განკარგულებით დამტკიცებული წესით გათვალისწინებული ფასთა ინდექსაციის ანაზღაურება.

 

აღსანიშნავია, რომ 2018 წლიდან დღემდე საქსტატი აწარმოებდა მშენებლობის ღირებულების კვარტალურ ინდექსს, რომელიც შვედეთის სტატისტიკის ექსპერტების დახმარებით შეიქმნა, თუმცა ის მხოლოდ საცხოვრებელი შენობების სეგმენტს მოიცავდა. ახალი ინდექსი მოიცავს როგორც საცხოვრებელი და არასაცხოვრებელი შენობა-ნაგებობების სეგმენტებს, ისე სამოქალაქო მშენებლობას. ის შექმნილია საერთაშორისო მეთოდოლოგიასთან სრულ შესაბამისობაში, მსოფლიოს სხვადასხვა ქვეყნის გამოცდილების გათვალისწინებით.

 

ვინაიდან CCI-ის ერთ-ერთ უმნიშვნელოვანეს კომპონენტს წარმოადგენს მშენებლობის პროცესში შრომის ანაზღაურებაზე გაწეული დანახარჯები, ინდექსის შესაქმნელად დაინერგა ახალი ყოველთვიური პერიოდულობის გამოკვლევა, მშენებლობის დარგში დასაქმებულთა საშუალო თვიური ანაზღაურების განსაზღვრის მიზნით.

 

ინდექსის შესახებ მეთოდოლოგიური ან სხვა სახის დამატებითი შეკითხვების შემთხვევაში, შეგიძლიათ დაუკავშირდეთ ფასების სტატისტიკის დეპარტამენტს ტელეფონებზე: 236 72 10 (400/405), ან ელექტრონული ფოსტის მისამართზე: gtetrauli@geostat.ge