გოგიტა თოდრაძე გენდერული სტატისტიკის მსოფლიო ფორუმში მონაწილეობს

თარიღი: 30 აგვისტო 2023

საქსტატის აღმასრულებელი დირექტორი გოგიტა თოდრაძე, გაეროს სტატისტიკის სამსახურის მიერ ორგანიზებულ გენდერული სტატისტიკის გლობალურ ფორუმში მონაწილეობს, რომელიც 2023 წლის 28 აგვისტოდან 1 სექტემბრის ჩათვლით სამხრეთ აფრიკის რესპუბლიკაში, ქ. იოჰანესბურგში იმართება.

 

ფორუმის მიზანს წარმოადგენს მზარდი გამოწვევებისა და შესაძლებლობების პირობებში, გენდერული სტატისტიკის განვითარების გზების ძიება, შესაბამისი სტრატეგიული მიზნების განსაზღვრა და გენდერულ სტატისტიკასთან დაკავშირებით არსებული საუკეთესო პრაქტიკის გაზიარება. შეხვედრის მიზანია ასევე, გენდერული მონაცემების წარმოებასთან დაკავშირებულ პრობლემების განხილვა და მათი გადაჭრის შესაძლო გზების ძიება.

 

ფორუმის ფარგლებში გოგიტა თოდრაძემ მონაწილეობა მიიღო სხვადასხვა პანელურ დისკუსიებში და სამუშაო შეხვედრებში, რომლებიც გაეროს და სხვა საერთაშორისო ორგანიზაციების ორგანიზებით გაიმართა. მოხსენებისას მან დამსწრე საზოგადოებასთან ისაუბრა საქართველოში გენდერული სტატისტიკის განვითარების ძირითადი მიმართულებების, არსებული გამოწვევებისა და ალტერნატიულ მონაცემთა წყაროების გამოყენების შესაძლებლობების შესახებ.

 

საქსტატის ხელმძღანელთან ერთად ფორუმში მონაწილეობს აღმასრულებელი დირექტორის მოადგილე - პაატა შავიშვილი და სოციალური სტატისტიკის დეპარტამენტის უფროსი ვასილ წაქაძე, რომლებმაც დამსწრე საზოგადოებას პრეზენტაციის სახით გაუზიარეს საქართველოს გამოცდილება, ქვეყანაში გენდერული სტატისტიკის მაჩვენებლების წარმოების თავისებურებების შესახებ.

 

ფორუმში მსოფლიოს სხვადასხვა ქვეყანის 200-მდე წარმომადგენელი მონაწილეობს, მათ შორის არიან სხვადასხვა ქვეყნის სტატისტიკის სამსახურების ხელმძღვანელი პირები, საერთაშორისო და ადგილობრივი ორგანიზაციების წარმომადგენლები, ექსპერტები და მაღალი თანამდებობის პირები.