ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
ვებგვერდის ადაპტირებული ვერსია შეზღუდული შესაძლებლობის მქონე პირებისთვის შექმნილია საქართველოს სტატისტიკის ეროვნული სამსახურის (საქსტატი) მიერ გაეროს განვითარების პროგრამისა (UNDP) და შვედეთის მთავრობის ხელშეწყობით.
უკან დაბრუნება
თარიღი: 15 ოქტომბერი 2025
საქართველოს სტატისტიკის ეროვნულ სამსახურში (საქსტატი) 2025 წლის 15–17 ოქტომბერს სამუშაო ვიზიტით იმყოფება გაეროს ევროპის ეკონომიკური კომისიის (UNECE) ექსპერტთა მისია.
მისიის მიზანია საქსტატისთვის ტექნიკური დახმარების გაწევა ენერგიის ფიზიკური ნაკადების ანგარიშებისა (PEFA) და ჰაერში ემისიების ანგარიშების (AEA) შემუშავების პროცესში, აგრეთვე საერთაშორისო გამოცდილების გაზიარება.
ვიზიტის ფარგლებში განხილული იქნება გარემოსდაცვითი-ეკონომიკური ანგარიშგების სისტემის (SEEA) იმპლემენტაციის მიმდინარე მდგომარეობა საქართველოში, არსებული პროგრესი და შემდგომი განვითარების გზები.
მისიის პროგრამა მოიცავს უწყებათაშორისი მრავალმხრივი სამუშაო შეხვედრისა და ტექნიკური სესიების ჩატარებას, რომლებშიც საქსტატის თანამშრომლებთან ერთად მონაწილეობას მიიღებენ საქართველოს გარემოს დაცვისა და სოფლის მეურნეობის სამინისტროს, ეკონომიკისა და მდგრადი განვითარების სამინისტროს, ასევე გარემოსდაცვით საკითხებზე მომუშავე არასამთავრობო ორგანიზაციების წარმომადგენლები.
UNECE-ის ექსპერტები იმუშავებენ PEFA-ს საპილოტე ცხრილებზე, განიხილავენ ტექნიკურ გამოწვევებს NACE კატეგორიების მიხედვით ენერგიის და ემისიების ანგარიშების შედგენაში და შეიმუშავებენ კონკრეტულ რეკომენდაციებს მონაცემთა ხარისხის გაუმჯობესების და საერთაშორისო მეთოდოლოგიის ინტეგრირების მიზნით.
გარემოს სტატისტიკის განვითარება საქსტატის ერთ-ერთ პრიორიტეტს წარმოადგენს და ასახულია საქართველოს ოფიციალური სტატისტიკის ეროვნული სისტემის განვითარების სტრატეგიის (2024–2027) სამოქმედო გეგმაში.
