სამუშაო შეხვედრა სოფლის მეურნეობის სტატისტიკის მომხმარებლებთან

თარიღი: 25 მაისი 2016

საქართველოს სტატისტიკის ეროვნული სამსახურის (საქსტატი), გაეროს სურსათისა და სოფლის მეურნეობის ორგანიზაციის (FAO) და აშშ-ს სოფლის მეურნეობის დეპარტამენტის (USDA) ორგანიზებით სოფლის მეურნეობის სტატისტიკის მომხმარებლების სამუშაო შეხვედრა გაიმართა. 
საქსტატის მიერ სამუშაო შეხვედრაზე წარმოდგენილი იყო 2014 წლის სასოფლო-სამეურნეო აღწერის ძირითადი შედეგები და სამომავლო გეგმები. შეხვედრაზე მოხსენებით გამოვიდა აშშ-ს სოფლის მეურნეობის დეპარტამენტის წარმომადგენელი, რომელმაც სასოფლო-სამეურნეო აღწერის შემდგომი სტატისტიკური საქმიანობის შესახებ ისაუბრა. ამასთანავე, მომხმარებლებმა და ექსპერტებმა წარმოადგინეს საკუთარი ხედვა საქართველოში სოფლის მეურნეობის სტატისტიკის შესახებ. შეხვედრა პრეზენტაციებისა და კითხვა-პასუხის რეჟიმში გაიმართა. 
უწყების აღმასრულებელი დირექტორის მოადგილის განცხადებით, ძალიან მნიშვნელოვანია ასეთი სახის შეხვედრების ჩატარება, რადგან ის ხელს უწყობს სტატისტიკური ინფორმაციის მომხმარებლების ინფორმირებას, კომუნიკაციის და ინფორმაციის ურთიერთგაცვლის კარგი საშუალებაა. მაია გუნცაძის თქმით, შეხვედრის მსვლელობისას მონაწილეებს საშუალება ჰქონდათ მოესმინათ ინფორმაცია საქსტატის სამომავლო გეგმების, ახალი სტატისტიკური კვლევების და პროდუქტების, მიმდინარე საერთაშორისო თანამშრომლობის პროექტების შესახებ. 
როგორც ცნობილია, საქართველოს 2014 წლის სასოფლო-სამეურნეო აღწერა საქსტატმა გაეროს სურსათისა და სოფლის მეურნეობის ორგანიზაციის (FAO) მიერ რეკომენდებული 2006-2015 წლების მსოფლიო სასოფლო-სამეურნეო აღწერის პროგრამის შესაბამისად ჩაატარა. საქსტატმა სასოფლო-სამეურნეო აღწერის შედეგები 2016 წლის 28 აპრილს გამოაქვეყნა.