აშშ-ს სოფლის მეურნეობის დეპარტამენტმა (USDA) საქსტატს ტექნიკური დახმარება გაუწია

თარიღი: 24 აგვისტო 2017

აშშ-ს სოფლის მეურნეობის დეპარტამენტმა (USDA) საქართველოს სტატისტიკის ეროვნულ სამსახურს ტექნიკური დახმარება გაუწია. კომპიუტერული ინვენტარი და საქართველოს სასოფლო-სამეურნეო აღწერის პუბლიკაციები და ბროშურები დღეს USDA-ს წარმომადგენლებმა დემნა ძირკვაძემ და მაიკლ შტაინერმა საქსტატის თანმშრომლებს გადასცეს. 
USDA-ის მიერ გადმოცემული ტექნიკა (12 კომპიუტერი, ლეპტოპი, პროექტორი და ეკრანი) განკუთვნილია საქსტატის სოფლის მეურნეობის სტატისტიკის წარმოების გაუმჯობესებისათვის. 
ტექნიკური დახმარების ფარგლებში USDA-მ საქსტატს საქართველოს სასოფლო-სამეურნეო აღწერის 800 პუბლიკაცია და 15 000 ბროშურა დაუბეჭდა. პუბლიკაცია მოიცავს 2014 წელს სასოფლო-სამეურნეო აღწერის შედეგად მიღებულ მრავაფეროვან ინფორმაციას საქართველოს სოფლის მეურნეობის შესახებ: მეურნეობების სარგებლობაში არსებული მიწის სტრუქტურისა და გამოყენების, პირუტყვისა და ფრინველის სულადობის, სასოფლო-სამეურნეო ტექნიკის გამოყენებისა და მათ საკუთრებაში არსებული რაოდენობის შესახებ და სხვა. პუბლიკაციები განკუთვნილია სოფლის მეურნეობის სტატისტიკის მომხარებელთათვის. 
აშშ-ს სოფლის მეურნეობის დეპარტამენტი (USDA) საქსტატთან სოფლის მეურნეობის სტატისტიკის განვითარების მიმართულებით 2005 წლიდან აქტიურად თანამშრომლობს. წლების განმავლობაში USDA მნიშვნელოვანი პარტნიორია და ტექნიკურ და მეთოდოლოგიურ მხარდაჭერას უწევს საქსტატს სოფლის მეურნეობის სტატისტიკის განსავითარებლად.