გოგიტა თოდრაძის შეხვედრა გაეროს ქალთა ორგანიზაციის ევროპისა და ცენტრალური აზიის ოფისის რეგიონულ დირექტორთან ბელენ სანზ ლუკესთან

თარიღი: 12 სექტემბერი 2025

საქართველოს სტატისტიკის ეროვნული სამსახურის აღმასრულებელი დირექტორი გოგიტა თოდრაძე, გაეროს ქალთა ორგანიზაციის ევროპისა და ცენტრალური აზიის ოფისის რეგიონულ დირექტორს, ბელენ სანზ ლუკეს შეხვდა. შეხვედრაზე განხილული იქნა ნაბიჯები გენდერული მონაცემების მიმართულებით მათი სტრატეგიული პარტნიორობის გაძლიერებისთვის.

 

შეხვედრაზე განსაკუთრებულად აღინიშნა საქსტატსა და გაეროს ქალთა ორგანიზაციას შორის ხანგრძლივი თანამშრომლობა, რომელიც გადამწყვეტი იყო საქართველოში გენდერული თანასწორობისა და ქალთა გაძლიერების დღის წესრიგის წინსვლაში — გენდერული მონაცემების ხელმისაწვდომობისა და გამოყენების გაუმჯობესებით.

 

საქსტატი და გაეროს ქალთა ორგანიზაცია აერთიანებს ძალებს ხარისხიანი გენდერული მონაცემების წარმოებისთვის, რათა ისინი უფრო ხელმისაწვდომი და გამოყენებადი გახდეს, რადგან სანდო მონაცემები არის მტკიცებულებებზე დაფუძნებული პოლიტიკის შემუშავების ძირითადი საფუძველი — რაც ეხმარება გამოწვევების იდენტიფიცირებას, პროგრესის გაზომვას და უზრუნველყოფს, რომ გენდერული პერსპექტივა ყველგან იქნას გათვალისწინებული და არავინ დარჩეს მიღმა.