საქართველოს განათლების სამინისტროსა და სტატისტიკის ეროვნულ სამსახურს შორის ურთიერთთანამშრომლობის მემორანდუმი გაფორმდა

თარიღი: 11 ივნისი 2014

11 ივნისს, მოსახლეობის საყოველთაო აღწერა 2014-ის ფარგლებში, საქართველოს განათლების მინისტრმა ქალბატონმა თამარ სანიკიძემ და საქართველოს სტატისტიკის ეროვნული სამსახურის აღმასრულებელმა დირექტორმა ქალბატონმა მერი დაუშვილმა ტექნიკური უნივერსიტეტის ადმინისტრაციულ კორპუსში ურთიერთთანამშრომლობის მემორანდუმს მოაწერეს ხელი. შეხვედრას საქართველოს ტექნიკური უნივერსიტეტის რექტორი ბატონი არჩილ ფრანგიშვილი და 200-მდე სტუდენტი დაესწრო. მემორანდუმის მიზანია სტუდენტების ინფორმირებულობის ამაღლება 2014 წლის მოსახლეობის საყოველთაო აღწერის მნიშვნელობის შესახებ. შეხვედრაზე ასევე განიხილეს აღწერის პერიოდში ახალგაზრდების შესაძლო დასაქმების საკითხი.